王志民去立會食飯加逛逛 就係唔So咖喱飯

　　中聯辦主任王志民今日出席立法會為佢而設嘅午宴，Jenny記得，今次係王志民做咗中聯辦主任以來，第一次出席立法會嘅午宴，亦都係立法會隔咗5年以來，再有中聯辦主任出席宴會。所以今日Jenny都特登早咗嚟立法會，已經見到唔少行家拎齊架生、整裝待發啦！

純以觀賞角度去睇，係畫得唔錯嘅！

事先張揚送禮事件

　　而整裝待發嘅又點只得記者呢！新民主同盟范國威（咖哩飯）已經事先張揚，同Jenny講會喺今日午宴開始嘅時候，向王志民送出由佢親手畫嘅水墨畫喎！咖喱飯以前係讀美術系畢業，之前佢擺街站所畫嘅水墨畫有幾掂，相信大家都有目共睹。佢今次去王志民送出嘅墨寶，就畫咗已故國家領導人鄧小平、王志民同埋特首林鄭嘅肖像，都真係畫得幾似！不過王志民就唔願意收，最後咖哩飯仲被保安帶離場添！

　　點解志民兄唔肯收呢？事關咖喱飯幅畫就畫咗鄧小平做背景，同王志民、林鄭月娥背對背。咖哩飯話，咁係代表中聯辦近年多次介入香港內部事務，係違背咗鄧小平所講嘅「一國兩制」、「港人治港，高度自治」承諾，隔離仲題埋「昨天信誓旦旦，今天背信棄義」以表不滿。

志民拒收小平因覺冒犯?

　　王志民就話，一來中聯辦唔可以收禮；二來咖哩飯畫鄧小平做背景、道具，係傷害咗13億中國人民嘅感情！佢話，因為鄧小平是「700多萬香港同胞在內的13億多中國人，十分敬仰的一代偉人」，覺得咖喱飯用咗鄧小平做道具，「是對我們共同的偉人一種極大不尊」，所以更加唔會去接！不過，小妹只見畫中鄧小平個樣都係畫得好慈祥，照理就冇一句係批評鄧小平。係咪真係對鄧小平不敬、傷害咗邊個嘅感情?小妹真係睇唔透啊!志民兄可能你想太多喇!take it easy 啦!話分兩頭，就算志民兄想釋出善意去收都收唔到啦！皆因中聯辦唔可以收禮嘛！咖哩飯做咩唔做定功課呀？